എന്നെ നോക്കിയൊന്നു പുഞ്ചിരിക്കുമോ?
എന്റെ പുഞ്ചിരിക്ക് മറുപടിയോതുമോ?
വ്യഗ്രമായി മിടിക്കുന്ന ഹൃദയവുമേന്തി
ധൃതി പിടിച്ചോരോട്ടത്തിനിടയില്
തല ചരിക്കാന് മടിക്കുന്ന പ്രിയ സുഹൃത്തെ
എന്നെ നോക്കിയൊന്നു പുഞ്ചിരിക്കുമോ?
അന്ന്
നമുക്ക് പുഞ്ചിരിക്കാനറിഞ്ഞിരുന്നു
സ്നേഹ മന്ത്രങ്ങള് ഹൃദിസ്ഥമായിരുന്നു
സൌഹൃദത്തിന്റെ താളം
നാം ഹൃദയത്താല് തൊട്ടറിഞ്ഞു
നിന്റെ കണ്ണുകളിലൂടെ ഞാന് എന്നെ കണ്ടു
ഇന്ന്
ആ കണ്ണുകള്ക്ക് കറുത്ത കണ്ണട വച്ച്ചതെന്തിന്?
ചുറ്റും മതില്ക്കെട്ട് തീര്ത്തതെന്തിന്?
എന്നെ കണ്ടില്ലെന്നു നടിക്കുന്നതെന്തിന്?
യന്ത്രമായ് മാറുമെന്നു ഭയന്നാണ് ഞാന്
എന്റെ കറുത്ത കണ്ണട വലിച്ചെറിഞ്ഞത്
ചുറ്റുമതില് തകര്ത്ത് കളഞ്ഞത്
വലിച്ചു കീറുമോ നീയും പ്രിയനേ,
നിന്നെ പൊതിയുന്ന കറുത്ത തിരശീലയെ?
തലതിരിച്ചൊന്നു നോക്കുമോ നീ,
എന്നെ നോക്കിയൊന്നു പുഞ്ചിരിക്കുമോ?
No comments:
Post a Comment