മോചനം

"ഞാനിന്നു പോകുന്നില്ല. വല്ലാത്ത തല വേദന".

അതും പറഞ്ഞവള്‍ തിരിഞ്ഞു കിടന്നു. അയാളൊന്നും പറഞ്ഞില്ല. സമയം 8 മണി. അയാള്‍ വേഗം കുളിക്കാന്‍ കയറി. കുളി കഴിഞ്ഞിറങ്ങിയപ്പോലും അവള്‍ കിടക്കുകയാണ്. അയാളവളുടെ അടുത്ത് ചെന്നിരുന്നു. മൂര്‍ധാവില്‍ തലോടി.

"ഡോക്ടറെ കാണണോ?".

അയാള്‍ ചോദിച്ചു.

"വേണ്ട".

അവള്‍ പറഞ്ഞു.

അയാള്‍ വേഗം ഡ്രസ്സ്‌ ചെയ്തു ഓഫീസിലേക്ക് പുറപ്പെട്ടു. വഴി നീളെ അവളായിരുന്നു മനസ്സില്‍.

രണ്ടു വര്‍ഷമാകുന്നു വിവാഹം കഴിഞ്ഞിട്ട്. അമ്മയായിരുന്നു അവളെ അയാള്‍ക്ക് വേണ്ടി കണ്ടെത്തിയത്.വരുന്ന ജോലികളൊന്നും ഇഷ്ടപ്പെടാതെ ഇഷ്ടമുള്ള ജോലിക്ക് വേണ്ടി കാത്തിരിക്കുന്ന സമയം. ഒറ്റ മകന്‍, ധാരാളം സമ്പത്ത്. അതുകൊണ്ട് തന്നെ ജോലിയില്ലാതത് ആര്‍ക്കും ഒരു പ്രശ്നമായി തോന്നിയില്ല. അങ്ങനെയിരിക്കുമ്പോഴാണ് ഈ ആലോചന. "അച്ഛന്‍ മരിച്ചു പോയി, അമ്മാവനാണ് നോക്കി വളര്‍ത്തുന്നത്. നല്ല കുട്ടിയാണ്. നീയൊന്നു പോയി കണ്ടു നോക്ക്".

അമ്മ പറഞ്ഞു. തീരെ താല്‍പര്യമുണ്ടായിരുന്നില്ല. ജോലിയും ചുറുചുറുക്കുമുള്ള അടിപൊളി പെണ്‍കുട്ടിയായിരുന്നു മനസ്സില്‍. എങ്കിലും അമ്മ പറഞ്ഞത് കൊണ്ട് പോയി.കാണാന്‍ സുന്ദരിയായിരുന്നു. എങ്കിലും നാണക്കാരി. നിറഞ്ഞു നിന്ന നാണത്തെക്കാളും പരിഭ്രമതെക്കാളും താന്‍ ശ്രദ്ധിച്ചത് ആ മുഖത്തെ ദൈന്യതയായിരുന്നു. അത് കണ്ടിട്ട് തന്നെയാണ് സമ്മതം മൂളിയത്.

വളരെ ആര്‍ഭാടമായിതന്നെ കല്യാണം നടന്നു. ആകെയൊരു നാണക്കാരി. വീട്ടില്‍ വരുന്ന സുഹൃത്തുക്കള്‍ മുന്‍പില്‍ വരാന്‍ പോലും നാണം. എങ്കിലും പാവം. എല്ലാം മാറ്റിഎടുക്കണമെന്ന് അപ്പോഴേ മനസ്സില്‍ കുറിച്ചു.

സ്വപ്നം കണ്ടത് പോലൊരു ജോലി, അതും ഈ മേട്രോപൊളിട്ടന്‍ നഗരത്തില്‍ കിട്ടിയപ്പോള്‍ എല്ലാം മറന്നു.അമ്മയുടെ എതിര്‍പൊന്നും വക വെച്ചില്ല. അവളെയും കൊണ്ട് പറന്നു. ഇവിടെ സെറ്റില്‍ഡായി. അവള്‍ക്കും അത്ര ഇഷ്ടമൊന്നുമുണ്ടായിരുന്നില്ല. എങ്കിലും തന്റെ ഇഷ്ടം നോക്കി.

ഇവിടെയെത്തി പതുക്കെ എല്ലാം മാറ്റിത്തുടങ്ങി. അവളുടെ വേഷവും രൂപവുമെല്ലാം . സാരി മാത്രമുടുത്തിരുന്ന അവളെക്കൊണ്ട് സല്‍വാറും ജീന്‍സും കുര്‍ത്തയുമെല്ലാം ധരിപ്പിച്ചു. ബ്യൂട്ടിപാര്‍ലറുകളില്‍ കൊണ്ടുപോയി മോഡെണാക്കി. ഡിസ്കോകള്‍ക്ക് കൊണ്ടുപോയി. എല്ലാം മാറ്റിയപ്പോളും അവളുടെ മനസ്സ് മാത്രം മാറിയിരുന്നില്ല. അത് താനറിഞ്ഞിരുന്നു.

സുഹൃത്തുക്കള്‍ക്കും സഹപ്രവൃത്തകര്‍ക്കുമിടയില്‍ ഒരു താരമായി കൊണ്ട് നടക്കാന്‍ തനിക്കുല്സാഹമാണ്. ഇന്നലെ സുഹൃത്തിന്റെ വിവാഹ വാര്‍ഷികമായിരുന്നു. അതിന്റെ വക തകര്‍പ്പന്‍ പാര്‍ട്ടിയും. ഇരുണ്ട വെളിച്ചത്തില്‍ ഒഴുകി വരുന്ന പാശ്ചാത്യ സംഗീതത്തിനൊപ്പം അവളുടെ കൈകള്‍ പിടിച്ചു ഡാന്‍സ് ചെയ്തു. അവളുടെ മുഖം അപ്പോളും തെളിഞ്ഞിരുന്നില്ല.

ഇടക്കെപ്പോഴോ സുഹൃതുക്കളിലോരാള്‍ അടുത്ത് വന്നു. അവന്‍ അവളുടെ നേര്‍ക്ക് കൈ നീട്ടി. അവള്‍ സംശയത്തോടെ നോക്കി. ആ മുഖത്തെ പരിഭ്രമം കണ്ടിട്ടും താന്‍ കണ്ണുകള്‍ കൊണ്ട് ആംഗ്യം കാണിച്ചു. അവന്‍ അവളോടൊപ്പം ആടാന്‍ തുടങ്ങി. അപ്പോളും കണ്ണുകള്‍ തന്റെ മുഖത്തായിരുന്നു. ഇടക്ക് അവന്റെ കൈകള്‍ അവളുടെ ശരീരത്തിലൂടെ ഇഴയുന്നത് താന്‍ കണ്ടതാണ്. ഒന്നും കണ്ടില്ലെന്നു നടിച്ചു. അവള്‍ നോക്കുമ്പോഴോക്കെ കണ്ണുകള്‍ വേറെ എങ്ങോട്ടെങ്കിലും തിരിച്ചു........

പാര്‍ട്ടി കഴിഞ്ഞു മടങ്ങുമ്പോഴും രണ്ടു പേരും ഒന്നും സംസാരിച്ചില്ല. വീട്ടിലെത്തിയപ്പോഴേ ഡ്രസ്സ് പോലും മാറാതെ അവള്‍ കിടന്നുറങ്ങി. വിളിക്കാന്‍ പോയില്ല. അങ്ങനെ കിടന്നുറങ്ങി.

"സര്‍ , ഓഫിസെത്തി".

ചിന്തയില്‍ നിന്നുണര്‍ന്നയാള്‍ കാറില്‍ നിന്നിറങ്ങി. ഓഫീസിലിരിക്കുമ്പോഴും മനസ്സ് ഭാരപ്പെട്ടിരുന്നു.

വൈകുന്നേരം നേരത്തെ വീട്ടിലെത്തി. അവള്‍ സോഫയിലിരിപ്പുണ്ട്. ടി വി യില്‍ നോക്കിയിരിക്കുകയാണ്. ചാനലുകള്‍ മാറി മറിഞ്ഞു കൊണ്ടിരിക്കുന്നു. മനസ്സിവിടെയൊങ്ങുമല്ല എന്ന് കണ്ടാലറിയാം.പകല്‍ അങ്ങിനെ കഴിഞ്ഞു പോയി. രാത്രി വേലക്കാരിയെടുത്തു വച്ച ഭക്ഷണം കഴിച്ചു അയാള്‍ മുറിയിലേക്ക് ചെന്നു. അവള്‍ കിടക്കുകയാണ്. ഉറങ്ങുകയല്ലാ എന്നയാള്‍ക്ക് മനസ്സിലായി. അയാളും കിടന്നു. എപ്പോഴോ ഉറങ്ങിപ്പോയി.......

ഉറക്കത്തില്‍ അയാള്‍ സ്വപ്നം കണ്ടു.

'തന്നോട്‌ ചേര്‍ന്നിരിക്കുകയാണ് അവള്‍. നിലാവില്‍ നോക്കി, അവളുടെ മുടിയിഴകളില്‍ തലോടി അവനവളെ ചേര്‍ത്ത് പിടിച്ചു. പതിയെ അവന്‍ എഴുന്നേറ്റ് അവളുടെ കൈകള്‍ പിടിച്ചു. എന്നിട്ട് അവളെയും കൊണ്ട് നടന്നു. നടന്നു നടന്നവര്‍ വെളിച്ചം മാത്രമുള്ള ഒരിടത്തെത്തി. കണ്ണ് മഞ്ഞളിപ്പിക്കുന്ന വെളിച്ചമായിരുന്നു അവിടെ. അവള്‍ വേദന കൊണ്ട് കണ്ണുകള്‍ പൊത്തി. എന്നിട്ടും അയാളവളെ വലിച്ചു കൊണ്ട് ആ വെളിച്ചത്തിലൂടെ നടന്നു. പെട്ടെന്ന്, ഭീകരമായൊരു ചീറല്‍. വലിയൊരു തീനാളം പാഞ്ഞു വന്നു. അയാള്‍ ഭയന്ന് പിറകോട്ടു നീങ്ങി. ഞൊടിയിടയിലതു ഒരു വലയമായി മാറി, അവളെ പുണര്‍ന്നു. അവള്‍ അലറിക്കരഞ്ഞു. ഒന്നും ചെയ്യാനാകാതെ തരിച്ചു നില്‍ക്കുമ്പോഴേക്കും ജ്വാലകള്‍ അവളെ പൊതിഞ്ഞു...............'

അയാള്‍ അലറി വിളിച്ചു.

കണ്ണ് തുറന്നു നോക്കുമ്പോള്‍ അവള്‍ മുന്നില്‍.

"എന്ത് പറ്റി?".

അവള്‍ ചോദിച്ചു. അയാള്‍ മറുപടിയൊന്നും പറഞ്ഞില്ല. പകരം അവളെ വാരിപ്പുണര്‍ന്നു.

"എന്റെ മോളെ.." .

അവള്‍ക്കൊന്നും മനസ്സിലായില്ല. അവളെ അങ്ങനെ ചേര്‍ത്ത് പിടിച്ചുകൊണ്ട് അയാള്‍ കുറെ നേരമിരുന്നു. പിന്നെ മോബൈലെടുത്തു. ഡയല്‍ ചെയ്തു.

"ഹലോ. അമ്മെ, ഞാനാണ്..... നാളെ ഞങ്ങള്‍ അങ്ങോട്ട്‌ വരികയാണ്. ഇനി അവിടെ താമസിക്കാന്‍ പോകുന്നു. മതിയായി ഇവിടെ..."

" നേരാണോ മോനെ? അമ്മക്ക് സന്തോഷായി".

അമ്മയുടെ വാക്കുകളില്‍ ഒരായിരം പൂത്തിരി ഒരുമിച്ചു കത്തിയത് പോലെ സന്തോഷം. ഫോണ്‍ വച്ച് അയാള്‍ ഒന്ന് നെടു വീര്‍പ്പിട്ടു. അയാളെത്തന്നെ നോക്കിയിരിക്കുകയാണവള്‍...

"അതുമതി. അല്ലെ?".

അയാള്‍ ചോദിച്ചു. അവള്‍ പുഞ്ചിരിച്ചുകൊണ്ട് അയാളുടെ മാറിലേക്ക് ചാഞ്ഞു.....