കലണ്ടര്‍

ദിവസങ്ങളുടെയും
അക്കങ്ങളുടെയും
മാസങ്ങളുടെയും
പേര് കൊടുത്ത്
ഓര്‍മ്മകളെ
മനസ്സില്‍ കുറിച്ചു
തുടങ്ങിയപ്പോളാണ്
കലണ്ടറിനെ ശ്രദ്ധിച്ചത്.
ആലോചിച്ചപ്പോള്‍
ഒടുവിലിങ്ങനെ തോന്നി,
ജീവിതവുമൊരു കലണ്ടറെന്ന്.
കറുപ്പും ചുവപ്പും
നിറങ്ങള്‍ മാത്രമേയുള്ളൂ
ഹൃദയത്തില്‍ കുറിച്ചു വയ്ക്കുന്ന
അക്ഷരങ്ങള്‍ക്കും.
നഷ്ടങ്ങളുടെ കറുത്ത ദിനങ്ങള്‍,
ഒരിറ്റു സന്തോഷവും
ചിലപ്പോള്‍ വേദനയുമാകുന്ന
ചുവപ്പ് ദിനങ്ങള്‍.
അക്കങ്ങളെണ്ണിയെണ്ണി
മാസങ്ങളെ മറിച്ചിട്ട്‌
നമ്മളെക്കാള്‍ മുന്‍പേ
കാലം സഞ്ചരിക്കുമ്പോള്‍
തിരിഞ്ഞു നോക്കാന്‍
കെല്‍പില്ലാതെ കൂടെയോടും.
നിസ്സംഗതയോടെ നോക്കും
പിറകിലേക്കല്ല, മുന്നോട്ട്.
അപ്പോളും നൊമ്പരത്തോടെ
മനസ്സ് പിറുപിറുക്കും,
'അക്കങ്ങളെ മാത്രമല്ലേ
പിറകില്‍ തള്ളാന്‍ കഴിയൂ.
ഓര്‍മ്മകളെയല്ലല്ലോ'!