തൂക്കിലേറ്റപ്പെടേണ്ടവരെ
ചുമലുകളിലേറ്റി,അവര്‍
സിംഹാസനത്തിലിരുത്തി.
അത് വരെയും ചുട്ടെരിക്കപ്പെട്ട
ആത്മാക്കളെയോ
എല്ലാവരും ചേര്‍ന്ന്
ചെരിപ്പിനടിയിലിട്ടു ഞെരിച്ചു.
അന്നേ മരിച്ചതായിരുന്നു
നീതിയുമതിനൊപ്പം.
പണ്ടേ മരിച്ച നീതിക്കായ്
ഇനിയും വിലാപമെന്തിന്?
മുഖം മൂടിയണിഞ്ഞവരെത്തേടി
നിയമമെത്തില്ല, അതിനാല്‍
നിങ്ങള്‍ക്കാഹ്ലാദിക്കാം,
കരഘോഷമുയര്‍ത്താം.
ധൃതിപ്പെട്ട് കയര്‍ മുറുക്കുമ്പോള്‍
ശ്രദ്ധിക്കണം,
ആരാച്ചാരന്മാരുടെ കൈകളില്‍
രക്തക്കറ പുരണ്ടിട്ടുണ്ടോയെന്ന്‍,
സിംഹാസനസ്ഥരുടെ മുഖങ്ങളില്‍
വന്യമാമൊരു ചിരി,
തെളിഞ്ഞുവരുന്നുണ്ടോയെന്നും.
No comments:
Post a Comment